Það viðraði ágætlega til skemmtannahalds í Þistilfirði í gær 28.des. Það stirndi á snjóinn í logni og heiðskýru veðri.
Kvenfélagskonurnar skipulögðu fjölbreytta skemmtidagskrá. Yngstu börnin voru kölluð á svið og héldu á kertaluktum á meðan kvenfélagskonurnar sungu fallegt jólalag. Arnar Freyr 16 ára drengur úr Laxárdal spilaði á harmonikku nokkur lög, og var honum klappað lof í lófa. Fólk lýsti ánægju með að unga fólkið tæki virkan þátt í dagskránni. Að lokum sungu nefndarkonur lagið Jólakötturinn og á meðan tiplaði "jólakötturinn" ábúðarmikill um sviðið!
Hljómsveitina skipuðu þeir Óli, Jón og Gunnlaugur sem hafa leikið fyrir dansi á þessum skemmtunum í gegn um árin. En það er líka ánægjulegt að geta þess að nú er komin inn nýr hljómsveitarmeðlimur, Þórhallur Agnarsson 12 ára drengur sem spilaði með þeim á jólaballinu, barnabarn þeirra Jóns og Óla. Magnaður strákur sem spilar snilldarvel á trommur. Fréttir bárust um að sést hefði til rauðklæddra sveina í Hófaskarðinu og væru þeir á leið í Svalbarðsskóla á leið á jólaballið. Skyndilega var barið hressilega á dyr og i salinn komu Hurðaskellir og Kjötkrókur .Var þeim fagnað mjög. Þeir færðu börnunum mandarínur og sælgæti og dönsuðu með samkomugestum í kringum jólatréð. Að lokum urðu þeir að kveðja og halda för sinni áfram til fjalla. Þessu hófi lauk svo samkvæmt venju með kaffisamsæti. Á boðstólum voru gómsætar tertur og margskonar veislubrauð sem heimamenn koma með á jólaballið og úr verður glæsilegt kaffihlaðborð.
Fleiri myndir frá jólaskemmtuninni í myndasafni þessarar síðu.
